PERSONALIA

Robert Frank Maduro a nace na Aruba un 28 di Juni 1967. Robert ta unico yiu di su mayornan. Robert ta comparti bida cu su Sra y hunto nan tin tres yiu, 1 yiu muher y 2 yiu homber. Robert a pasa su estudio basico na Tarsicuis y Dominicus Colege, despues su estudio secundario na La Salle Colege MAVO, y su estudio avansa na MTS Cesar Terzano.

COMO PROFECIONAL

Robert ta ambtenaar den servicio di gobierno for di aña 1993 ocupando diferente funcionnan tanto na Dienst Tecnishe Inspecties (1993 – 1996), Ministerio di Cultura, Turismo,Salubridad y Deporte (1996 -2001), Instituto di Cultura Aruba (2001 – 2009), Ministerio di Asuntonan General ( 2009 – 2013) y di 2013 te cu awe Robert ta traha na Departamento Di Cultura Aruba y ta eherciendo e funcion di coordinador pa cu Organisacionnan Gubernamental y no Gubernamental di Aruba ariba e tereno cultural pa gobierno.

COMO LOCUTOR

Como locutor Robert tin varios aña den e medio aki cu ta radio diffusion. Robert a cuminsa como hoben juda den transmissionnan di eventonan cu Radio Antiyana. Despues cu inicio di Radio Revolucion cu despues a bira Bo Guia FM, Robert a cuminsa cu su carera activo como locutor. Y dia prome di november 2012, Robert ta ser acerca door di Ruben Garcia pa forma parti di e team di locutornan di e emisora nobo aki cu Power 101.7 FM. For di e dia eynan te cu awe Robert ta conduci e programa “ E Koffie” cu ta den aire tur mainta di 6or pa 8or. Tambe Robert ta compaña e crew di transmision di Power FM cu ta cubri diferente eventonan manera Festival di Dande, Eventonan di Carnaval, Festivalnan Cultural di Himno y Bandera y mucho mas. Robert ta sumamente orguyoso di ta un di e Power Rangernan di Power 101.7 FM.

COMO MUSICO

Robert su interes pa musica a cuminsa for di chikito na Dominicus College tocando cu frèrenan den klas. Como hoben Robert e tempo eynan na La Salle College, ta topa cu dos maestro cu ta discubri su talento y ta motive pa sigui den musica.

Robert su carera musical ta cuminsa na e mesun La Salle Colege momento cu ta forma un grupo di gaita pa un celebracion di fin di aña na scol. Despues di esaki e ta ser aserca dor di su amigo, otro gran musico Albertico Tico Kelly pa forma parti e tempo ey di Tipico Placentero. Robert a cuminsa den Tipico Placentero como timbalero y despues e grupo a introduci cantamento, y aki ta caminda e nomber a cambia pa Placentero Ritmo y Cuerde y tambe e exitonan a cuminsa.

Placentero Ritmo y Cuerde un agrupacion cu a revoluciona farandula aki nan Aruba den añanan 80 y 90, dor cu nan tabata hobennan tocando nos musica tipico y folclorico. Akinan Robert a descubri otro di su gran talentonan esta composicion. Robert a cuminsa compone y graba su mesun cancionnan y hunto cu Placentero Ritmo y Cuerde tabata produci y graba casettenan, disconan y despues cd-nan tur esakinan cu hopi exito.

Robert a participa na diferente ocasion na Festival di Dande y a sa di conquista e titulo di Rey di Dande na cuatro ocasion. Den festival di Tumba Robert a sa di participa na numeroso ocasion na unda e la wordo premia diferente biaha pero nunca a logra conquista e titulo maximo. Mas serca cu e la logra di yega na e corona ta como prome finalista. Tambe Robert a participa varios biaha na Calypso y Roadmarch Contest na unda tambe a logra bai cu algun premiacion.

Na aña 2000 Robert ta lanta su mesun agrupacion folclorico cu ta Robert y Su Alma Folklorico. Cu e grupo aki Robert a produci mas cu 15 disco compacto, a logra un sin fín di exito y a sa di hiba nos folclor internacional.

Bandanan cu Robert a fungi aden como cantante sea den temporada di carnaval y durante temporadan regular ta Tipico Placentero, Placentero Ritmo y Cuerde, The Grasshopper Band, Banda TIGO, BLADE, Robert y su Solo Banda Show, BADU, Alma Folklorico , Alma Next Level yactualmente tambe di Limited Edition y Tipico Candela.

Robert ta pidi na tur hende pa nan stima, mantene y promeve nos cultura pasobra no tin cultura aki nan mundo mas bunita cu esun di nos Aruba. Y sigui nos tur dia na Power 101.7 FM

Danki Aruba pa e apoyo y sosten di semper.

Y FLOKLOR TE DEN ALMAAAAA